Zikr-i tevhid ile tâlib Hakka vâsıl mı olur
Ma'rifetle hüsn-ü hulkdur talibi kâmil eden
Her ne denlü varsa itsen hem kamu sâlih amel
Ma'rifetle hüsn-ü hulkdur talibi kâmil eden

İlm-i resmi ile zâhid acaba kâmil mi olur
Ma'rifetle hüsn-ü hulka var mıdır hiç bir bedel
Darb u devrân ile virme yok yere ömre halel
Ma'rifetle hüsn-ü hulkdur talibi kâmil eden

Şugl-ı esma ile etsen aç susuz hem âh-ü- vah
Sen günâh anladığından komasın hergiz günâh
Çille vü halvetde görsen nice bin nûr-i siyah
Ma'rifetle hüsn-ü hulkdur talibi kâmil eden

Tende Hakdan olmamışdır râh-ı Hakdan behredâr
Kümmelini-i evliyanın yolun eyle ihtiyar
Ma'rifetdir âdemi âdem iden ey dilfikâr
Ma'rifetle hüsn-ü hulkdur talibi kâmil eden

Anladık kim bu görünen sende ola cân-ü-ten
İrmedik tevhide şirki kodu seni may-ü-men
Zât-ı Hakka vâsıl olmaz bilmeyen hulk-ı hasen
Ma'rifetle hüsn-ü hulkdur talibi kâmil eden

Hâb-ı bîdârında sofi gördüğündür hep hayâl
Ehl-i irfan olmadın kim görüne sana cemâl
Bahr-i zâta gark olup bulmak dilersen ger kemâl
Ma'rifetle hüsn-ü hulkdur talibi kamil eden..

Sunullah Gaybi