Benem ol mihnet ü derd ile yâr olan âşık
Benem ol fürkat-i hicr ile zâr olan âşık
Benem ol akl gibi târumâr olan âşık
Benem ol aşk gibi bÎ karâr olan âşık
Figân u âhum ile yaşum olmadı teskin.
Diriga cânuma geçdi firak-ı yâr-ı Güzin

Divane Mehmet Çelebi

bihamdillah ki bî nâm u nişanız âdımız yoktur
dil-i viranemizden özge bir abadımız yoktur
ezelden mazhar-ı ışkız bizim icadımız yoktur
elemler cümle bizdendir anâ isnadımız yoktur

belâ dildendir ol dildâr elinden dadımız yoktur
gönüldendir şikâyet kimseden feryadımız yoktur

ne derd-i hecr-i yâri çekmeğe bir merd kaabildir
ne efkâra alâka eylesek mâkula kaaildir
söze gelmez velî dânâ dil-i insân-ı kâmildir
akar sû gîbi ârâm eylemez her serve maildir

belâ dildendir ol dildâr elinden dadımız yoktur
gönüldendir şikâyet kimseden feryadımız yoktur

düşersem hâk-i pây-i yâra rûy-ı i'tizâr üzre
görüp ol serv salmaz sayesin ben hâksâr üzre
sözün doğrusu bû kim hergiz olmam bir karâr üzre
safâ-yı hatırım yok muttasıl kâr inkisar üzre

belâ dildendir ol dildâr elinden dadımız yoktur
gönüldendir şikâyet kimseden feryadımız yoktur

bizim erbâb-ı ıska sıdk ile ikrarımız vardır
riya ehlinden i'râz eyleriz inkârımız vardır
biz özge hâceyiz herkes ile bâzârımız vardır
tükenmez fikrimiz efkâr olunmaz kârımız vardır

belâ dildendir oî dildâr elinden dadımız yoktur
gönüldendir şikâyet kimseden feryadımız yoktur

gâh olur vuslatı yâd eyleriz firkatte handâniz
gâh olur firkati yâd eyleriz vuslatta giryânız
gehî evkâr-ı ışkız gâh mestiz gâh hayranız
semaî gîbi gâhî mübtelâ-yı derd-i hicranız

belâ dildendir ol dildâr elinden dadımız yoktur
gönüldendir şikâyet kimseden feryadımız yoktur

Divane Mehmed Çelebi