Alîl-i derd-i isyâna devâsın yâ Resûlallâh
Bize sûy-ı cinâna reh-nümâsın yâ Resûlallâh

Sana âşık olanlar secde eyler hâk-i pâyında
Cemî-i ümmete kıble-nümâsın yâ Resûlallâh

Yaradılmazdan evvel pâdişâhım hep bu âlemler
Cenâb-ı Hakk ile sen âşinâsın yâ Resûlallâh

Cihânda fâsık u fâcir kerem senden ümîd eyler 
Şefâat kıl Habîb-i Kibriyâsın yâ Resûlallâh

Ne yüzle varacak Leylâ huzûra rûz-ı mahşerde
Ana rahm eyle Şâh-ı Enbiyâsın yâ Resûlallâh

Leyla Hanım

Bu cismim ateş-i aşkınla yansun Yâ Resûlallah,
Dü çeşmim hâb-ı gafletten uyansun Yâ Resûlallah,

Gidüp boynumda zincirimle ben ol Ravza-i Pâke
Görenler hep beni divane sansun Yâ Resûlallah,

O rütbe ağlayam çöllerde feryad eyleyem ben kim
Sirişk-i dîdem al kana boyansun Yâ Resûlallah,

Şu kâfir nefs elinden bu dil-i bî-çareyi kurtar,
Yeter cürm ü fısk u kabahatdan usansun Yâ Resûlallah,

Kulun Leylâ’yı mahşer ehline Sen eyleme rüsvây,
 Günahından bu dünyada utansın Yâ Resûlallah

~ 

Leylâ Hanım