Gubârı ravzanın kuhl-i cilâdır yâ Resûlallah
Gözümde hâk-i kûyun tûtiyâdır yâ Resûlallah

Cebînin sûre-i ve'ş-şems sînen matla‘-ı ve'l-fecr
Saçın ve'lleyl yüzün va'dduhâdır yâ Resûlallah

Şeb-i mi‘râcda na‘l-i şerîfin nakşın almış çarh
Biri meh birisi mihr-i semâdur yâ Resûlallah

Şemîm-i çîn-i zülfün şemmesidir müşg ile ‘anber
Anunçin müşge teşbîhi hatâdır yâ Resûlallah

Ne yüzle varayım yüz virmez iseñ bâb-ı rahmâna
Yüzümde rû-siyehlik rû-nümâdur yâ Resûlallah

Gubârım rûzgâr atmazsa semt-i ravza-i pâke
Dem-i mahşerde de işim hevâdır yâ Resûlallah

O denlü mücrimim zerre sevâbım varsa defterde
Ya sehv-i kâtibân ya iftirâdır yâ Resûlallah

Egerçi dâmen-i lâ-taknatû der-destdir ammâ
Yine her hâlde ümmîdim sanadır yâ Resûlallah

O deñlü lutfuña ümmîdvârum havf olup ma‘dûm
Zebâna her gelen harf-i recâdur yâ Resûlallah

Derûnum zikr ü fikr-i hazrete bî-gânedür gerçi
Niçe bî-hûde fikre âşinâdır yâ Resûlallah

Reh-i mescidde süst ü nâ-tüvân üftân u hîzândur
Tarîk-i fıskda pek tîz-pâdur yâ Resûlallah

Eger rûz-i cezâda sâhib olmazsan degil Cennet
Cehennem de bana nefret-nümâdur yâ Resûlallah

Şefaat suçluya derler meseldir söylenir dâ'im
Kulun Kânî de bir mücrim-gedâdır yâ Resûlallah

Kânî