Yüzünden halk-ı âlem pür-ziyâ'dır Yâ Resûlallah 
Siyah gözünle kaşın dil-rübâdır Yâ Resûlallah

Ruhin şevki ile gökde tarab eyler kerûbiyyûn 
Halâyık aşkına hep mübtelâdır Yâ Resûlallah

Dehânın nefhası vasfın edebilmez melek insan 
Ki medh eden seni bizzat Hudâdır Yâ Resûlallah

Mu'anber sünbülin şevkiyle yanar rûz u şeb gönlüm 
Dişinle arş-ı a'zam rûşenâdır Yâ Resûlallah

Dudağın lezzetine âb-ı Kevser selsebîl uymaz 
Lisânın tercümân-ı rehnümâdır Yâ Resûlallah

Vücûdın bâ'is-i halk-ı semâvat cümleye rahmet 
Diyen ol Hâlik-ı arz u semâdır Yâ Resûlallah

Dahi re's-i hümâyunın yukaru yedi kat gökden
Mubârek ayağın tahte's-serâdır Yâ Resûlallah

Çün oldı cism-i pâkin mübtedâ bu kâinâte çün 
Yine ol kâinâta müntehâdır Yâ Resûlallah

Teşerrüf ederiz ism-i şerifin eylemekle yâd 
Bi-külli derdlere zikrin devâdır Yâ Resûlallah

Ne mümkündür bu Kııddûsî fakir meddâhın olmak kim 
Murâdı rûz-ı mahşerde likâdır Yâ Resûlallah

Kuddusi