Izdırâbı terk et ey dil Hakk'ı dâim eyle yâd
Sakınıp ihsân-ı abd-i âciz ile olma şâd
Erişip lütf-i Hüdâ bir gün olursun ber-murâd
Geldi bir pîr-i Hüdâ bu beyti kıldı gûşe-i yâd
Bir kapıyı bend ederse bin kapı eyler küşâd
Hazret-i Allâh, efendi, fâtihü'l-ebvâbdır

Kul eğer ihsânını kat' eylese çekme elem
Ol dahî muhtâc-ı bâb-ı Zül-atâ vü Zül-ikrâm
Bağlanıp bâb-ı Hüdâ'ya koma dilde gam u hemm
Vird edin subh u mesâ bu beyti gel sen dembedem
Bir kapıyı bend ederse bin kapı eyler küşâd
Hazret-i Allâh, efendi, fâtihü'l-ebvâbdır

Rızk içün efkâra düşüp Şemsîyâ etme telâş
Çün mukadderden ziyâde olamaz etme savaş
Sây ile mümkün değildir hâsılı akl-ı meâş
Sen tevekkül ile bâb-ı Hakk'a teslîm eyle baş
Bir kapıyı bend ederse bin kapı eyler küşâd
Hazret-i Allâh, efendi, fâtihü'l-ebvâbdır

Şemsi