TERCÎ-İ BEND-İ MATLA-I HAYÂLÎ

Kalb bir gencedir cismin anın vîrânesi

Feyz bir bahr-ı kerâmetdir sözüm dür-dânesi

Nutk bir tût-i hôş-gûdur derûnum lânesi

Eşk bir sahbâ-yı âteşdir gözüm peymânesi

Ye’s bir mihmâh-ı gamdır hâtırım kâşânesi

Dâğ bir mürg-ı semenderdir ten âteş-hânesi

Aşk bir şem’-i ilâhîdir benim pervânesi

Şevk bir zencîrdir gönlüm anın dîvânesi

Âh bir kez fursat olmaz cevr-i gerdûndan bâna

Bir nefes düşmez şikâyet tab’-ı mahzûndan bana

San gülâb-efşân olur dil çeşm-i pür-hûndan bana

Kesb-i zevk etmek ne mümkün câm-ı gülgûndan bana

Feyz yokdur hikmet-i akl-ı Felâtundan bana

Keşf olur âdâb-ı sûziş rûh-ı Mecnûndan bana

Aşk bir şem’-i ilâhîdir benim pervânesi

Şevk bir zencîrdir gönlüm anın dîvânesi

Gâh hakikât cilve-gâh eyler derûnum geh mecâz

Geh safâ-yı lutf-ı hayret geh şikest-i imtiyâz

Gâh sulh ü gâh ceng ü gâh nâz u geh niyâz

Bin belâ teskîn eder ol gamze-i hâtır-nevâz

Iztırârîdir efendim bende bu sûz ü güdâz

Mahv olup bir gün bu cism-i zâr olur ifşâ bu râz

Aşk bir şem’-i ilâhîdir benim pervânesi

Şevk bir zencîrdir gönlüm anın dîvânesi

Eylemiş zülfün perîşân rûy-ı âteş-tâbda

Hâb-ı mahmûrâne-i çeşmin gören mehtâbda

Ol siyeh mest-i nigeh mey nûş eder mihrâbda

Ben hayâl-i kâkül ile böyle pîç ü tâbda

Söylenir bu güft ü gûlar meclis-i ahbâbda

Aşkı ol efsâne zann eyler hayâl-i hâbda

Aşk bir şem’-i ilâhîdir benim pervânesi

Şevk bir zencîrdir gönlüm anın dîvânesi

Böyledir hâl-i dilim vallâhi inkâr eylemem

Mürg-ı dînim beste-i tesbîh-i zünnâr eylemem

Bülbül-âsâ her dem efgânı gül ü hâr eylemem

Mâcerâ-yı girye-i hicrânı tekrâr eylemem

Ben zebân-ı şu’le-i âh-ı şerer-bâr eylemem

Gamla hoşnûd olmuşum hîç şekve ızhâr eylemem

Aşk bir şem’-i ilâhîdir benim pervânesi

Hevk bir zencîrdir gönlüm anın dîvânesi

Hastegî-i çeşm-i bîmârı hakîm etmiş beni

Ol leb-i cân-bahş gûyâ ki adîm etmiş beni

Za’f ile gülzâr-ı manâya nesîm etmiş beni

Bir vücûd olmuş vücûdumla nedîm etmiş beni

Gamzesi tîg-i nigâh ile dü-nîm etmiş beni

Berk-i hüsnü hem hamûş u hem kelîm etmiş beni

Aşk bir şem’-i ilâhîdir benim pervânesi

Şevk bir zencîrdir gönlüm anın dîvânesi

Hatt-ı rûy-ı dilberi Gâlib edip bir gün hayâl

Oldum âhir âteş-i baht-ı siyehden bî-mecâl

Gâh fikr-i dûzah-ı hecrinde hâtır pür-melâl

Geh cünûn-ı şevk ile kayd-ı ser-i zülf-i visâl

Tâb-ı sevdâ-yı mahâbbetden ederken kîl ü kâl

Geldi eş’âr-ı Hayâlîden bu matla’ hasbihâl

Aşk bir şem’-i ilâhîdir benim pervânesi

Şevk bir zincîrdir gönlüm anın dîvânesi